عفا الله عن خطا غدر

بسم الله الرحمن الرحيم

عفا الله عن خطا غدر الخناجر والضلوع ابطال..
بسامح واتركك تحت الظلام الحالك لحالك..

دخيلك وفر دموعك ترى هدر الدموع اذلال..
وترى ما فيه أحد يصبر مثل صبري بغربالك..

أنا عيب علي أنقض كلامي والرجال افعال..
واذا قلت اقطع احبالك تراني بقطع حبالك..

عشان اكسب هدب عينك تجرعت العذاب أشكال..
وليتــــــك ترأف بحـــــالي علشــــان أرأف بحالك..

مســـوي في حياتي شي ما يذكر ولا ينقال..
حشا حتى العدو وهو العدو ما يعمل اعمالك..

تمسيني على الهم وتصبحني على الغربال..
تقلطنــــــي فنــــــاجيلك وتقصر عني دلالك..

تحملت التعب لأجلك وأنا حملي يهد جبال..
رحلت من العذاب وما وقفت الا على جالك..

علامك كل ما جيك متواضع جيتني تختال؟
معاك الى متى بصبر وصبري معك يحلالك؟!!

مثل ما أقبلت لعيونــك لــــــــزوم تلد لي باقبــــــال..
ومثل ما قد حشمتك حس واحشم قلبي اشوى لك..

أنا محدن بجابرني أساير معك هالمنوال..
ترى لاني تبيع لك ولاني بأصغــر عيالك..

أنا جيت أعشقك نبض ومشاعر ما أعشقك (تمثال)..
أنا جيت أسكنك وأحيـــاك وأبقى فيك وأبقـــــى لك..

أنا جيت بظما عاشق تعب يطرد سراب اللال..
أنا جيت أستفـــــز رضاك من فرقاك وألجا لك..

أنا ما همت بك عاقل أنا كنت أعشقك بخبال..
أنا ما كنت احبك حي أنا كنت أعشقك هالك..

تخيل من كثر ما أخــاف تلقـــــى للزعل مدخال..
أخاف أخطي على طيفك وأدوس برجلي ظلالك..

تبعتك والعرب تتبع رعود البــــارق الهمال..
وأنا شفت المطر يتبعك في حلك وترحالك..

كأن اللي خلق حسنك خلقني مع جسدك ظلال..
وصرت أقرب جسد يمشي معك باقفاك واقبالك..

أبي قلبك يحــس انه فقد بمحبتـــه رجــــــال..
ملكته من هدب عين وخسرت رضاه باهمالك..

صحيح ان الفراق أقسى ولكن الوصال محال..
أنا صعبن علي أرضي غرورك وأضعف قبالك..

بعد ما حققت عيني فبعدك للرقاد أمـــال..
أعود للسهر؟ -- يا خوي فال الله ولا فالك!..

ببدل نظرتك فيني وأجي لك كل يوم بحال ..
بكون أقــــرب من ثيابــك عليك ولا تهيا لك..

بلمك وأنثرك وأجمعك وأرجع وأنثرك باهمـــــال..
بخونك وأزعلك وأرضيك وأزعل منك وأرضى لك..

أبرسم بالثرى وجهك وأبدفن صورتك برمال..
أبشكي للعرب فرقاك وأضحك عند عذالك..

أبهديك الوصال فراق وأهديك الفراق وصال..
بسوي مثل ما شوفك تسوي وأفعل أفعالك..

عشان تعرف من فينا الزعول ومن وسيع البال..
أبيك تذوق فنجــــالي وأنا بـــــذوق فنجـــــالك..

نصيحة واحتفظ فيها قصر معك الزمن أو طال..
أبي تســـــمع كلامي زين وتحطه على بالك..

اذا حبك هبال أطفال لك عندي هبال أطفال..
ولا وابشـــــر بعد بهبال حب ٍ ما هو بهبالك..

واذا قصدك تهين اسمي عشان تشمت العذال..
ترى لا أنت ولا غيرك ولا عشـــــرة من أشكالك ..

_________________